Los viajis de Monagu (2ª Parti)

Si las partis segundas suelin sel malas
no seré yo quien diga que esta sea güena
solo sé que a Monagu tiru con bala
en los versus que forman esti poema.

Tras oil sus curiosas esplicacionis
hoy quieru comentarus en estas rimas
que sólu le faltó que nos confesara
que Olga no es su amiga¡¡era su prima!!

En Canarias a Monagu
lo llamaban Güili Fó,
le pusierun esi moti
por las vecis que viajó.

Si esti hombri se proponi
realizal la güelta al mundu
no la da en ochenta días,
¡te la da en venti segundus!

En esa ruea de prensa
estuvu mu cherrión,
y estaba más gentinosu
que un volcán en erupción.

Critical al presidenti
ya no será necesariu
dispués de velu en la teli
con los estractus bancarius.

Por esu si sus palabras
tuvieran algu de ciertu
yo os invitu a que leais
las disculpas de Robertu.

Jui perdón señol Monagu.
Le ruegu que me perdoni.
Yo pensaba que a Canarias
iba usté de vacacionis;

peru ya me doy yo cuenta
de que estaba equivocau
al sabel que sus viajis
ya los tieni acreditaus.

Yo no sabía que usté
está sufriendu chantaji,
y que no eran trenta y dos
¡eran dieciseis viajis!

Yo no sabía que usté
no tenía parabólica
ni que le chantajearan
de una forma tan diabólica.

Ignoraba que en su casa
no se cogi canal plus.
Resulta que usté es tan güenu
¡que hasta se paga la luz!

Solu faltaría
que no la pagara,
esu ya sería
tenel mucha cara.

Ha síu usté sometíu
a un injustu linchamientu.
Comprendu perfectamenti
que muestri su descontentu.

Hay vecis que reconoscu
que semus mu mal pensaus.
¿Habrá que dali las gracias
por sel usté tan honrau?

¿Quieri que creamus
que no es de la casta
a pesal que cobra
muchísima pasta?

¡Qué atrevía es la ignorancia!
¡Lo que jaci el no sabel!
Yo le ofrezcu mis disculpas
si las quieri usté cogel.

Y si no quieri cogelas
pos me va a sental mu mal,
porqui siempri le he teníu
comu un hombri mu formal.

Sus viajis a Canarias
están llenus de ironía.
Esta es la segunda parti.
¿Quieri usté una trilogía?

Se la haré con muchu gustu
si no degüelvi las perras,
pos si no hay devolución
me tendrá aquí dandu guerra.

ROBERTO MARTÍN MORENO