Barbara y el Rey

 

 

 

 

-«¡Ay papa,qué desazón!»

-«¿Qué te pasa Felipín?

¿Han encerrau ya a tu hermana

y al Iñakin Urdangarín?»

 

-«¿Encerral a esa pareja?

Esu sería milagrosu,

peru yo vengu pa hablalti

de algu más escandalosu.

 

Dispués de vel la otra nochi

Cincuenta sombras de Grey,

me pusi a miral el feisbu

y vi que Bárbara Rey

 

estuvu enrollá contigu

manteniendu una aventura.»

-«¡Calla por Dios hiju míu!

Tou esu es una locura.

 

Esas cosas las publican

pa hacel dañu a la Corona.

No te pueu negal que Bárbara

es un chica mu mona.

 

Y es posibli que le moli

muchu más que el Ángil Cristu,

peru apenas la conozcu.

Un par de vecis la he vistu.»

 

-«Pos dici Bárbara Rey

que algunus del CNI

le pagarun muchas perras

pa que no hablasi de tí.

 

Y ara mismu te confiesu

que me sientu avergonzau

porque dicin que esas perras

provenían del Estau.»

 

-«Ja ja ja.Yo es que me partu

Me ríu por no lloral.

¡Si es que estus republicanus

ya no sabin que invental!

 

Sé bien que mis detractoris

no me tienin muchu apegu

porque siempri van diciendu

que yo soy un mujeriegu.

 

Y aunqui yo no soy asina,

no haci falta que te cuenti

que esa fama me persigui

desdi que era adolescenti.»

 

-«¿Entoncis con esa moza

no tuvisti ná de ná?»

-«Ni con esa ni con otras.

Te lo juru de verdá.»

 

-«¿De verdá me lo prometis?»

-«De verdá te lo prometu.

Esu solu son injurias

que me faltan al respetu.

 

Mucha genti va diciendu

que he ligau con muchas chatis,

peru tú nunca te creas

semejantis disparatis.

 

Peru escúchami una cosa.

Pa que luegu no me ladri,

esti tema no lo saquis

si cherrias con tu madri.

 

Pueis hablali de Palomas,

de Cristinas o de Petras,

peru Bárbara es tabú.

¡No pronuncis esas letras!

 

Que la pobri de Sofía

a vecis está que trina,

porque piensa que me estuvi

trajinandu a la Corinna.

 

Y si le vienis ahora

hablánduli de esa moza,

puei cogelmi de los pelus

y ponelsi mu furiosa.»

 

-«No sé,no sé papaitu.

No me voy mu convencíu.

Me da a mí la sensación

de que otra vez mas mentíu.

 

Y siempri se cogi antis

a un mentirosu que a un coju.

Y na más que hablé de Bárbara

tú te pusisti mu roju.

 

Mira comu son las cosas,

que hasta a tu nieta Leonol

ya le han dichu que su agüelu

es un gran conquistaol.»

 

-«Esu son cosas de niñas.

Si dicin que soy ligón

es porque esa palabrina

siempri rima con Borbón.

 

Veti tranquilu a Zarzuela

y ocúpati de tus cosas.

Dali un besinu a mis nietas

y otru besinu a tu esposa.

 

Y si te espera Letizia

impacienti y espectanti

pa preguntalti enseguía

por mis supuestas amantis;

 

le respondis a mi nuera

que yo soy un hombri fiel,

y que sería incapaz

de engañal a mi mujel.»

 

-«Vali,vali,se lo digu,

peru no la via engañal.

Si le doy esa respuesta

se me va descojonal.

 

Quieru que sepas papuchi,

que aunqui ya estés en declivi

me voy a vel obligau

a ponelti un detectivi.

 

Y si salis por la nochi

a partil el bacalau,

a partil de esti momentu

vas a estal bien vigilau.»

 

-«Hombri Felipi,yo creu

que no es pa tantu la cosa,

que yo no soy tan ligón

comu el Mariu Viagras LLosa.»

 

-«¡Se acabó la discusión!

Escritu está en tu destinu

que mantengas encerrau

en la jaula al pajarinu.»

 

-«Madri mía,que fastidiu.

¡Si lo sé no me jubilu!

Pos con esi detectivi

no podré vivil tranquilu!»

 

No lleva bien Don Juan Carlus

que sea Felipi el que mandi,

y por esu el Rey Eméritu

tieni un cabreu mu grandi.

 

¿Estudiarán los políticus

sacal una nueva ley

pa que degüelva las perras

que le dio a Bárbara Rey?

 

Y sobri las comisionis

esas de investigación,

¿pedrirán que se abra una

pa investigal al Borbón?

 

Me temu que no lo harán,

pos no tienin la osadía

de ponel en su lugal

al Rey y a la monarquía.

 

ROBERTO MARTÍN MORENO