Operación Púnica

Les pidu a ustedis que me disculpin
si hablu de nuevu de corrupción,
yo no hablaría sobri esti tema
si no existiera tantu ladrón.

Tengu una duda que no resuelvu
sobri Granadus y Marjaliza,
cuandu los miru nunca distingu
quién es chorizu y quién longaniza.

A estus listillus de poca monta
el sel corruptus les hizu mella,
ya se acabarun las cacerías
y los hotelis de cincu estrellas.

Está mu claru que al par de pollus
la corrupción les pasó factura,
y ahora ya duermin en una celda
¡se lo merecin por caraduras!

Nunca pensarun que encontrarían
esas tres cuentas que hay en Suiza
y ahora se pasan el día llorandu,
echan de menus usal la visa.

También se quejan de la comía,
echan de menus comel mariscu.
Y yo me alegru,¡se les emplea!
por intental engañal al fiscu.

Se cuenta que esti Granadus,
de una forma mu arroganti,
quisu llamal la atención
de un humildi vigilanti.

-«¡Tú no sabis quién soy yo!
¡Estu no se puei comel!»
Y le diju el funcionariu:
-«Estu no es ningún hotel.

Te voy a dal un conseju.
Mientras estés encerrau
por la cuenta que te tieni
no hay que sel tan delicau.

Si toca lechi y galletas
a joelsi y aguantalsi,
y que sepas que a las ochu
mañana hay que levantalsi.

¿Sabis lo que sinifica
la palabra disciplina?
Pos si no lo aprendis prontu
voy a dalti una tullina.

Voy a dalti otru conseju
que el que avisa no es traidol,
si hacis casu a lo que digu
dormirás muchu mejol.

Si en la ducha te se escapa
la pastilla de jabón
no te agachis a por ella
que eris carni de cañón.

No te agachis a por ella,
no cometas esi errol
porqui aquí vas a encontralti
de lo malu lo peol.

No te agachis a por ella
que te vas a arrepentil
porqui aquí no te respetan
ni aunqui seas un edil.

No cometas la torpeza
de cogel esa pastilla
porqui aquí los hay con ganas
de buscalti las cosquillas.

¡Déjala tirá en el suelu!
¡Pórtati comu un gallina!
Si te acercas a por ella
te untarán con vaselina.

Unu que era tesoreru
tuvu el valol de agachalsi
y estuvu más de dos mesis
de pie sin poel sentalsi.

En las duchas de la cárcil
hay que andal con pies de plomu
porqui muchus presidiarius
te querrán metel en domu.

Lo que puei sucedelti
no es un platu de güen gustu
porqui aquí no son bien vistus
los políticus corruptus.»

Al oil estus consejus
se queó comu asustau
y se cuenta en el talegu
que entoavía no sa duchau.

Y un reclusu le decía:
«¡Que te canta el alerón!»
Y Granadus respondía:
«Veti tú a por el jabón»

La mujel de esti corruptu
se aprendió bien la lección
y ha perdíu la memoria
comu la hija del Borbón.

No sabía que su esposu
recibía comisionis
e ignoraba que a Suiza
se llevaba los millonis.

No sabía que su esposu
lo que hacía es blanqueal
y por esu le sorprendi
que lo quieran condenal.

A esta amnésica mujel,
según mi humildi opinión
la deberían metel
con su esposu en la prisión.

Digu estu porqui ella
durmió en el mismu colchón,
por lo tantu debi sel
de su misma condición.

ROBERTO MARTÍN MORENO