Crónica de Eurovisión

Se venía comentandu
muchu antis del comienzu:
«Esti añu ganaremus
porqui canta Rut Lorenzu!

Iba España a Euruvisión
comu la gran favorita,
peru una mujel con barba
que se llamaba Conchita,

ganó el festival de calli
montándusi un gran revuelo,
y asina sin despeinalsi
les ha dau a tous pal pelu.

Ha dichu nuestra cantanti
jurandu que no exagera:
«Le dierun muchus más puntus
que al Rey cuandu se le opera.»

Horas dispués declaró
en esa nochi estresanti:
«Que Portugal no me voti
me pareci preocupanti.

No alcanzu yo a comprendel
que nuestru país vecinu
no se haya dignau a dalmi
ni tan siquiera un puntinu.

Mu mal san portau los lusus,
a mí me han decepcionau,
¿es que no lo merecía?
¿Acasu he desafinau?

¿Es que no les ha gustau
el estribillu en inglés?
Pos habelu dichu antis
y lo cantu en portugués.

Si sigu hablandu del tema
no dormiré a pierna suelta,
por esu a lo que ha pasau
no quieru dali más güeltas.»

Si hagu casu a los rumoris
que circulan en la red,
el próximu añu esti eventu
no me lo quieru perdel;

pos se está rumoreandu
que el amigu Paquirrín
quieri formal un duetu
con el diestru Jesulín.

El hiju de la Pantoja
se está comiendu un yogur
y asegura que ellus cantan
mejol que Conchita Vur.

Y el esposu de la Campa
también opina lo mismu,
es decil,que ven las cosas
con demasiau optimismu.

Yo no sé si estus muchachus
ganarán el festival,
peru sí nos garantizan
el diluviu universal;

pos si se arranca el de Ubriqui
a cantal el Toa Toa
tienin que salil de allí
montaus en una canoa.

Esta vez los portuguesis
sólu tendrán una opción,
y es la de dali a estus tipus
la máxima puntuación;

pos el públicu asistenti
presionará dandu vocis:
«Al toreru y al dislloki
no les deis menus de doci.»

¿Con qué canción actuarán?
De momentu es un misteriu,
peru sé que el par de pollus
se lo ha tomau mu en seriu.

Vayan sacandu el paraguas
que en menus que canta un gallu
ha dichu Kiku Rivera
que empezarán los ensayus.

Y aunqui se acerca el veranu
se prevén inundacionis,
pos las nubis se cabrean
cuandu escuchan sus cancionis.

Ensayan en un garaji
que no está insonorizau,
y montan tantu jaleu
que ya los han denunciau.

Vinierun rápidamenti
los de la guardia civil,
y al golpeal a la puerta
no les quisierun abril.

Con la ilusión que ellus tienin
de ganal la Euruvisión
esperu que a estus muchachus
no los metan en prisión.

Ya os contaré más alanti
cuandu cantin estus tíus
si ganan el festival
o se vienin de vacíu.

ROBERTO MARTÍN MORENO