El evasor de oro
En la prensa deportiva
va circulandu el rumol
de que Cristianu Ronaldu
también es defraudaol,
pos dicin que ha defraudau
cientu cincuenta millonis
pa poelsi costeal
sus lujosas vacacionis.
El Ministeriu de Hacienda
le está siguiendu la pista,
porque a Cristianu Ronaldu
no hay que perdelu de vista.
Y ara dicin que Montoru
(que no se le escapa una)
está moviendu los hilus
pa investigal su fortuna.
Mientras tantu Florentinu,
con muchísima arrogancia,
al hablal sobri esti tema
no le dio mucha importancia.
Y además ha dichu Florin
cuandu hablaba sobri «El Bichu»,
que es injustu que a su estrella
se le ponga en entredichu.
Ayel hablandu en la teli
nos confesó el portugués:
«Yo me consideru honrau
de la cabeza a los pies.
Dicin que a las Islas Vírginis
me llevaba las perrinas,
peru esu solu lo dicin
porque me tienin inquina.
Esa genti que lo dici
me ha puestu en un compromisu.
¿Cómu habrán averiguau
que estuvi en el paraísu?
A pesal de lo que digan
no me piensu retiral.
¡Y muchu menus ahora
que acabu de renoval!
Y me tieni sin cuidiau
que me sigan dandu cera,
que estu no va suponel
el fnal de mi carrera.
Yo no sé ni lo que firmu
cuandu echu un garabatu,
peru si hay algún problema
yo lo arreglu de inmediatu.
Si me ponin una multa
y me cobran interesis,
yo la pagu a tocateja,
pos me la he ganau con crecis;
peru tengu que decirus
que esu de evadil impuestus
no me va quital el sueñu
porque duermu comu un cestu.
Se lo diji a Sergiu Ramus
y al Emiliu Butragueñu,
que esti líu con Hacienda
no me va quital el sueñu.
Hay algunus que me acusan
de que la he liau bien parda.
¡Menus mal que Florentinu
es mi ángil de la guarda!
Y si algunu se atreviesi
a llamalmi sinvergüenza,
sé mu bien que el presidenti
va salil en mi defensa.»
Ronaldu,Messi,Neymal,…
Al final tous son igualis.
Les gusta tenel las perras
en paraísus fiscalis.
Y de una forma o de otra
siempri se buscan la maña
pa llevalsi lo que ganan
a cuentas fuera de España.
ROBERTO MARTÍN MORENO
