Adios a la Mina de Estaño

Si ya le dijimus adiós a Euruvegas
también le diremus lo mismu a la mina,
ningún inversol nos financia el proyectu,
ningunu se atrevi a soltal la gallina.

Se diju en su día que estu iba en seriu,
que iba a empezalsi en unu o dos añus,
y ya ven ustedis comu son las cosas,
aún no se ha abiertu la mina de estañu.

Quisierun ponelnus la miel en los labius,
querían vendelnus los cursus minerus,
y ahora nos vienin contandu milongas
porqui por lo vistu no llega el dineru.

Currículums muchus,trabaju ningunu,
fue tou una sarta de falsas promesas,
y comu en España mu pocus dimitin
será mu difícil que ruein cabezas.

Y siguin vendiendu más jumu que antis,
pos dici la junta que puei sel que un día
se abra la mina por arti de magia,
y vistu lo vistu¡cualquiera se fía!

Sin duda sería una grata noticia,
daría trabaju que falta nos haci,
peru es necesariu pa hacelsi ilusionis
tenel un pez gordu que nos financiasi.

Con la cara lavá y recién peiná,
(siempri sali de casa mu remuá)
con su gran limusina,su gran escolta
y una fotu en su bolsu de LLon Travolta;
ha pasau por el pueblu la Infanta Cristina
(me pareci que vieni a invertil en la mina)
y le diju un paisanu con tonu jocosu:
«Esa mina que buscas está en El Pedrosu.»
Yo no sé si esta miembru de los Borbonis
ha entendíu mu bien las indicacionis,
sólu sé que agilaba por un caminu
y en cuclillas se pusu a plantal un pinu.
¡Qué ilusión nos hacía sacal estañu!
Esta vía esta llena de desengañus,.
Esta vía esta llena de dezasonis,
no se acaban de il las preocupacionis.
Seguiremus viviendu con la esperanza
que los próximus añus sean de bonanza,
me despidu de ustedis hasta otru día
cuandu güelva de nuevu con mis poesías.
Una irá dedicá pa Justinu Biber
que ha síu vistu en el pueblu dentru del ciber,
y otra va dedicá pa Baracu Obama
¡vaya bronca me echó la primera dama!
Comu pareci que últimamenti
no me abandona la inspiración
voy a contarus próximamenti
cómu aterriza Ruiz Gallardón;
pos tieni unus perrus que son comu fieras
y son los culpablis de sus pesadillas
porqui lo arrastrarun por una esacalera
y le estropearun un par de costillas.

ROBERTO MARTÍN MORENO