De tal palo, tal astilla

 

 

 

 

Estas estrofas en las que explicu
lo que la genti debi sabel
con muchu gustu se las dedicu
a Ortega Canu y su churumbel.

Comu me sacan de mis casillas,
y aunqui me tenga que arrepentil,
sobri esti palu y sobri esta astilla
cuatru verdadis quieru decil.

Asegura el matadol
y aspiranti a presidiariu
que sólu prueba el alcohol
pa amollecelsi los labius.

Le está mintiendu a los juecis
y está mintiendu a la prensa,
y se mantieni en sus treci
con mu poquita verguenza.

Según confirman varius informis
iba en el cochi bastanti aprisa
peru él lo niega mu disconformi,
pues tieni un morru que se lo pisa.

Nunca ha sabíu estal a la altura
ni comportalsi comu un adultu,
¡y encima tieni la caradura
de recurril y pedil indultu!

Que está mu malu del corazón
nos dici ahora esti papanatas,
¡pos pocu malu estaba esi día
cuandu se pusu a bebel cubatas!

¿Pa qué quieri recurril
si sabi bien que hizu mal?
¡Que acati ya la sentencia
que le ha dictau el tribunal!

¡Qué pocu asumi las consecuencias!
¡Cómu mereci una buena torta!
¿Dos añus sólu por su imprudencia?
Esa sentencia se queda corta.

Su hiju Josi Fernandu
también se encuentra en un líu,
el muchachu sali a padri,
también conduci bebíu.

Peru encima es que no tieni
ni carné de conducil,
por esu lo detuvierun
los de la guardia civil.

Y desdi entoncis duermi en la trena,
se le atribuyin varius delitus;
esta persona no me da pena,
sinceramenti me importa un pitu.

Esti elementu tan conflictivu
está fichau por la policía
y es muy amigu de rodealsi
de señoritas de compañía.

Tieni tan poca cabeza
que ha teníu la ocurrencia
de gastalsi toas las perras
que le dierun por la herencia.

Por lo vistu recorri burdelis
siempri en busca de bellas zagalas
y le gusta dormil en hotelis
y escuchal a Dieguitu El Cigala.

Por los sitius que sali de farra
lo conocin como «El Orteguita»,
tieni fama de sel un macarra
y esa fama ya no se le quita.

Da problemas también en el trullu
y se meti en bastantis peleas,
siempri quieri metelsi en barullus,
sólu tieni que malas ideas.

Y aunqui a vecis se haga el gallitu
en el fondu sólu es un gallina,
y los presus ya pidin a gritus
que le den una buena tullina.

LLegó a la cárcil dispuestu
a sel el mandorotón,
peru ahora los reclusus
ya le apodan «el llorón.»

Y quizás tengan razón,
le pega bien esi moti,
pues llora con muchu cuaju
metíu entri los barrotis.

Dici que está arrepentíu
por lo mal que lo ha pasau,
y yo digu que esti críu
lo que está es acojonau;

pues escuché el otru día
(y no me resulta extrañu)
que por toas sus fechorías
le caerán más de tres añus.

Esperu que esté allí dentru
una buena temporá,
peru me temu que prontu
lo dejin en libertá.

Y respectu a Ortega Canu
piensu que sería un errol
que le dieran un indultu
del que no es merecedol.

Si al final lo metin presu
seguru que esti angelitu
no vuelvi a cantalnus esu
de «estamus tan a gustitu.»

Puedi sel que mis palabras
caigan en un sacu rotu,
peru tengu que decirlis
que si no las digu explotu.

Es posibli que el poema
tal vez se lo llevi el vientu
peru insistu nuevamenti,
si no lo escribu revientu.

Por esu aunqui mis palabras
no vayan a ningún lau,
ya puedin imaginalsi
lo a gustu que me he quedau.

ROBERTO MARTÍN MORENO