Los derrochaoris

Yo sería incapaz
de rompel un platu,
peru en cambiu Blesa
y Rodrigu Ratu

rompierun sin despeinalsi
una vajilla completa
con el usu fraudulentu
de las opacas tarjetas.

Comu las usaban
pa gastus privaus
su funcionamientu
no era complicau.

Se compraban ropa
en el Corti Inglés
y desodorantis
pal olol de pies.

Compraban entradas
pa vel a Pitingu
y también cartonis
pa jugal al bingu.

Y tiraban de tarjeta
pa viajal a Punta Cana
y pa entral a un club de alterni
en los finis de semana.

Esi tal Rodrigu Ratu
dilapidó en un ratinu
tres mil quinientus eurazus
en güiskis,cañas y vinu.

Se agarró una melopea
que andaba de lau a lau
y gritaba por la calli:
«¡Que me quitin lo bailau!»

¡Hay que vel el tíu
que prontu se alegra
ca vez que utiliza
la tarjeta negra!

Con esas tarjetas
que son tan opacas
a Ratu le duran
un mes las resacas.

Luegu está el amigu Blesa,
esti no es tantu de baris,
es más bien comu Juan Carlus,
le apasionan los safaris,

y compral en joyerías,
y jugal en los casinus
y pagal cincuenta pavus
por tomalsi un capuchinu.

Nuevi mil eurus na menus
despilfarró en un hotel
y ara dici que las perras
no las piensa devolvel.

También usan las tarjetas
que infringin tantu la ley
un tal Arturu Fernandiz
y un consejeru del Rey.

A esti últimu le gustan
los masajis filipinus,
comu siempri está estresau
quieri estal relajainu.

Me pareci,me pareci
que el que más despilfarró,
según dicin mis informis
es un tal Sanchiz Barcó.

Su tarjeta echaba jumu
peru el no se quemaba
y ara dici que él no sabi
que esu no se declaraba.

Pablu Iglesias diju anochi
celebrandu una asamblea
que si sali presidenti
va a metelus en verea.

Y Blesa sugieri
que nadi le voti,
peru por si acasu
ya lleva dodotis,

pos puei sel que le toqui
dormil en el calabozu
y tenga que despedilsi
de los hotelis lujosus.

Y allí es mu probabli
que duerma calienti
por sel el culpabli
de las preferentis.

Esti tarjeteru
era investigau
por un jues que ha síu
inhabilitau.

Y esu a mucha genti
les resulta extrañu
porque condenarun
al que no hizu dañu.

Y ya pa finalizal,
a esti clan de los opacus
yo les quieru recordal:
«La avaricia rompi el sacu.»

ROBERTO MARTÍN MORENO