EL PRUSÉS
Hoy regresu a TTN
dispués de una larga ausencia
pa contal las novedadis
del prusés de independencia.
Tal vez a algunas personas
no les gusti lo que escriba.
A mí tampocu me gusta
que esté yendu a la deriva
un país que unus y otrus
han puestu patas arriba.
Con el cientu cincuenta y cincu
¡menú follón! ¡Vaya líu!
Han cesau a Pugdemón,
Traperu destituíu…
Ya no golverá a mandal
sobri los mosus de esquadra,
y ara está comu emperrau.
¡No veas tú cómu ladra!
También se dici que Puchi
vivi un momentu mu críticu.
Por esu se fue a Bruselas
buscandu asilu políticu.
La Sais de Santamaría
güelvi a estal de actualidá.
Ara va sel la que mandi
en la Lleneralitá.
Esa mujel chiquinina
a la que naidi ha votau
sa convertíu en la jefa,
va partil el bacalau.
Por si acasu me santiguu.
¡Dios me coja confesau!
La alcaldesa Ada Colau
(a la que llaman la ambigua)
jaci lo mismu que yo,
ella también se santigua.
Algún independentista
ya rompió su D.N.I.
Tal vez se precipitó,
o esu me pareci a mí.
Tou estu nos va lleval
a unas nuevas eleccionis
pa que los politicuchus
cobrin nuevas subvencionis.
¿Eleccionis en Navidadis?
Estu pareci un mal sueñu.
¡Nos quierin hasta quital
el espíritu navideñu!
No quieru que en esas fechas
se me atraganti el turrón
viendu en la teli a toas horas
a Rajoy o al Pugdemón.
No quieru vel al gallegu
ni tampocu al catalán.
Mejol veré los dibujus
que estén poniendu en el Clan.
Junqueras,Tardá,Rufián,
la Arrimá,la Forcadel,
Rivera,Iceta,el Albiol,
la Colau,Ana Gabriel…
Por mí se puein il tous
paí pa la Conchinchina.
Prefieru vel Bob Esponja
o La Patrulla Canina.
Y mientras tantu Pujol
se rii a calzón quitau
de Marianu,de Junqueras
y hasta del Jefi de Estau.
¡Sigui sin pisal la cárcil
con to lo que sa llevau!
Aquí doy por concluías
mis humildis reflesionis.
Solamenti es mi opinión.
No pretendu dal leccionis.
Solamenti tengu ganas
de que el odiu y la violencia
se puean sustituil
por paz y por convivencia.
ROBERTO MARTÍN MORENO
