Añu electoral

Últimamenti se habla bastanti
de las ganancias de Monederu,
de lo que cobra Errejón de beca
y de la herencia de Zapateru.

Del liderazgu de Pedru Sánchiz,
de lo que piensa Susana Diaz,
se habla también de la trama Gurtil
y de los Eris de Andalucía.

De lo del áticu de Gonzáliz,
de lo que está sucediendu en Grecia,
de Arturu Mas,el independienti
y de la novia de Pablu iglesias.

Respectu a Pablu se va dicendu
que ha puestu en marcha la cuenta atrás,
y ara Rajoy tieni pesadillas
en las que escucha tic tac,tic tac…

Muchu se habla de las tarjetas
que regalaba Caja Madrí,
y de esus sueldus escandalosus
que dan por sel un hermanu Vi.

Se habla también de Esperanza Aguirri.
Se dio a la fuga ¿y qué ha pasau?
Pos que fugalsi no es un delitu.
Por esu el casu ya está archivau.

También se habla de Nicolás,
que es un muchachu con pedigrí,
porqui con menus de venti añus
ya trabajaba pal CNI.

De los Pujolis se va dicendu
que cuandu salin bebin de gorra.
¡Mira que llegan a sel tacañus!
¡Con lo que tienin guardau en Andorra!

Luegu está Bárcenas que siempri habla
de que existía la caja B,
peru por muchu que lo repita
siempri lo niegan los del PP.

Se habla también de Angelina Merkil
y sus políticas de austeridá,
peru ella nunca se las aplica
porqui careci de humanidá.

No es mu correctu cómu se trata
a los enfermus con hepatitis.
No se les da sus medicamentus,
peru es curiosu¡nadi dimiti!

Aquí en España no son frecuentis
las dimisionis en los partíus,
y al que le acusan de alguna cosa
siempri respondi:¡Que yo no he síu!

Comu se acercan las eleccionis
siempri habrá algunu que nos recuerdi
que está creciendu la economía
y que aparecin los brotis verdis.

Peru hay personas que pasan hambri
y están viviendu con sufrimientu,
por esu a vecis yo me preguntu:
¿Dóndi se nota esi crecimentu?

A las personas de clasi obrera
nos cuesta muchu salil del pozu,
porqui los brotis de los que hablan
van a las manus del poderosu.

Pa despedilmi quieru decirus
qué es lo que entiendu yo por la casta.
Son los que roban a manus llenas
y no degüelvin luegu la pasta.

ROBERTO MARTÍN MORENO