La Multa

-¿Quién está llamandu al timbri?
¿Es la espía Mata-Jari?
-No,Montoru.Te equivocas.
Soy tu amigu Jose Mari.

-¿El presidenti de honol
del Partíu Populal?
-El mismu que visti y calza.
Soy Jose María Aznal.

-No te queis en la puerta.
Pasa y siéntati en la silla,
que me están entrandu ganas
de leelti la cartilla.

Te llamau a mi despachu
pa cantalti las cuarenta
porque no quieris pagalmi
los impuestus de la renta.

-Me da a mí la sensación
que tas güeltu mui ariscu
desdi que te encomendarun
el ministeriu del fiscu.

-Yo cumplu con mi debel,
y multu al que no me paga.
Da igual que sea Gonzáliz
o un discípulu de Fraga.

-¿Y a cuántu asciendi la multa
por esta evasión fiscal?
-A mediu millón de eurus.
Es pocu,señol Aznal.

Con lo que te paga Endesa
sin agachal la costilla
esta multa que te he puestu
es tan solu calderilla.

-Pos no me pareci justu
que siendu yo un altu cargu
me estés haciendu pasal
esti ratu tan amargu.

No lo esperaba de tí.
Pensé que eras mi colega.
-Tú mismu te lo has buscau.
Con Hacienda no se juega.

Tienis que ingresal las perras
en esta cuenta corrienti.
¿Y que pasa si no pagu
y me declaru insolventi?

-¿Insolventi?¡Venga ya!
No me la darás con quesu.
¡Déjati en paz de bobás
y realízami el ingresu!

Lo sientu Jose María.
Lo de insolventi no cuela,
que ya me estoy dandu cuenta
que aquí el que no corri,vuela.

Que haci tan solu unus días
man llegau informacionis
que tu esposa Ana Botella
sin hacel oposicionis

ha fichau por un conseju
de esus de administración,
¡y oju al datu! lo recalcu,
sin hacel oposición.

Otra puerta giratoria
que se abri y no se cierra.
¡Comu no paguis la deuda
te declaru yo la guerra!

-Comu no te he convencíu
con estu de la insolvencia
tendré que sacal las perras
dandu alguna conferencia.

Voy un momentinu al bañu
que un cuescu se ma escapau.
Siempri me entran apretonis
cuandu estoy desazonau.

-Ya decía yo que había
algu raru en el ambienti,
y resulta que era un peu
del «ilustri» expresidenti.

Voy a echal ambientadol
pa eliminal esus gasis.
Hasta la vista Chemari.
¡Y ojitu con lo que hacis!

Que te estaré vigilandu
y seré tu pesadilla
comu no me ingresis prontu
el dineru en la cartilla.

Hoy he tratau de contarus
de manera resumía
la charla que mantuvierun
Montoru y Jose María.

Esperu que estus versinus
os hayan entreteníu.
Me marchu dandu las gracias
a quien los haya leíu.

ROBERTO MARTÍN MORENO