Las Desveturas de Viagras Llosa

Prestin atención ustedis

a lo que os cuentan mis musas.

A Viagras LLosa haci pocu

le atacarun las medusas.

 

Asina comu lo oyin.

No sé ni cómu ni cuandu.

Solu sé que sucedió

mientras se estaba bañandu.

 

Se encontraba en la toalla

bebiendu una coca cola,

pensandu en las musarañas

allí tirau a la bartola.

 

Y al ratu se levantó

con la única intención

de refrescalsi un poquinu

y dalsi un güen chapuzón.

 

Y allí entrarun en acción

esas medusas dañinas,

que al vel al gran seductol

no se andarun con pamplinas.

 

Esas temiblis medusas

no se andan con chiquitas.

Son comu el lobu feroz

que sali en Caperucita.

 

Le atacarun sin piedá,

sin ninguna compasión.

¡Qué penina daba velu

en aquella situación!

 

El premiu Nobil gritaba:

«¡Salvalmi de las medusas!»

Y había allí un socorrista

que pusu un montón de escusas.

 

«Que yo no doy horas extras,

que sa terminau mi horariu..»

Total,que se fue pa casa

sin salval al pobri Mariu.

 

(Sé que el LLosa en «El País»

trabaja de columnista,

peru nunca va contalnus

lo que le hizu el socorrista)

 

El pobri siguió gritandu:

«¡Cagu en dies,cómu me pica!»

Y la Presly le decía:

«No me seas tan quejica.

 

Digu yo que aunque te piqui

tampocu será pa tantu.»

-«Pos no me queju de viciu.

De verdad que no lo aguantu»

 

-«¿Tantu te pica amol míu?»

-«Si cari,me pica muchu.

Voy a tenel que ir a urgencias.

Estoy un pelín pachuchu.»

 

¡Qué penina daba velu

en aquella circunstancia,

con aquellas picauras

esperandu a la ambulancia!

 

¡Qué penina daba velu

agobiau por los picoris,

renegandu de su suerti

esperandu a los doctoris!

 

Por fin llegó al hospital,

y allí lo vio un practicanti,

que al vel cómu se quejaba

le pusu a Mariu un calmanti.

 

Dispués le dierun el alta

y regresarun a casa,

peru a pesal del calmanti

el dolol no se le pasa.

 

Esas picauras son

peol que un dolol de muelas.

Por esu esa nochi Mariu

dejó a la Presly a dos velas.

 

Ella entró en la habitación

con ganas de echal un quiqui,

y el LLosa con los picoris

se pusu mu tiquismiqui.

 

El hornu del premiu Nobil

pa muchus bollus no estaba.

De pocu sirvió el ligueru

que Isabelita estrenaba.

 

Y aunque al entral en la cama

se pusu un pocu mimosa,

esa nochi no hubu tema

con el Mariu Viagras LLosa.

 

Comu estu de las medusas

le sucedió en Indonesia,

le diju Mariu a la Presly:

«Si me casu por la iglesia,

 

pa nuestra luna de miel

eligiré otru destinu,

porque yo por Indonesia

no güelvu ni jartu e vinu.»

 

ROBERTO MARTÍN MORENO