El Gafe

El Príncipi Don Felipi
pareci que está gafau,
se monta en los avionis
y quedan averiaus.

Las azafatas al velu
comienzan a preocupalsi
y rezan un Padri nuestru
y empiezan a santigualsi.

Y los demás pasajerus
exclaman acojonaus:
«Ya ha llegau el herederu,
Dios nos coja confesaus.»

Y es que ya es habitual
que le digan los pilotus:
«Me pareci Don Felipi
que algún circuitu se ha rotu.

Una pieza del motol
se ha marchau a hacel puñetas,
es mejol que usté se baji
y se monti en bicicleta.

Con usté en los avionis
estu no lleva caminu,
no encontramus la manera
de llevali a su destinu.»

Y le diju Don Felipi
a un tripulanti mu feu:
«Volal en esti cacharru
la verdá es que me haci enteu.

No es que yo me consideri
un expertu en la materia
peru esti avión falla más
que una escopeta de feria.»

Comu estu ha pasau dos vecis
a Su Alteza le entra estrés
cuando piensa en un refrán
que dici:»No hay dos sin tres.»

Doña Leti ya no quieri
il con él en los viajis,
prefieri los balnearius,
el jacuzzi y los masajis.

Y se cuenta que ha teníu
con su esposa un rifirafi,
pos no le haci mucha gracia
que le digan que es un gafi.

Al llegal a La Zarzuela
le han dichu Sus Majestadis:
«Esu de las averías
sólu son casualidadis.

Por esu no te preocupis,
estati tanquilu hiju,
si de verdá eres un gafi
sólu una cosa te exiju.

No quieru que con tus manus
me toquis esi jarrón,
se lo compré a un anticuariu
y me ha costau un riñón.

Lo digu con cortesía,
lo digu sin amenazas,
no quieru que mi jarrón
lo toquis con tus manazas.»

Y Don Felipi se fue
mu cabreau con su padri
y el Rey le diju a la Reina:
«Tranquila,deja que ladri.»

Después de dal un portazu
ha regresau a su casa
y le diju Doña Leti:
«Vida mía,¿qué te pasa?»

-«He discutíu con mi padri,
me ha dichu que estoy gafau
y no me deja que toqui
un jarrón que se ha comprau.»

No te enfadis Felipín,
puedi que tenga razón,
es mejol que no te montis
nunca más en avión.»

-«Esu es lo que voy a hacel
pa evital más sufrimientu,
que montalmi en esi trastu
sólu me trai que tormentu.»

Yo no sé si será ciertu
que es un gafi el herederu,
por si acasu de momentu
yo a mi vera no lo quieru;

no sea que por accidenti
me ponga la zancadilla
y acabi en un hospital
con fractura de rodilla.

ROBERTO MARTÍN MORENO