¡Caray con la Monarquia! 3ª Parte

INTRODUCCIÓN

Antis que lean mis nuevas primicias
debu decirus con güenus modalis
que aunqui mis rimas parezcan ficticias
siempri se basan en jechus realis.

Esti el el final
de mi trilogía
sobri las cosinas
de la monarquía.

CAPÍTULU 1:EL JUBILAU

-«Ven pa cá hiju míu.
Ven pa cá Felipi,
siéntati un ratinu,
ven que yo te expliqui.»

-«Papa,tengu jambri
¿No tendrás un donu?»
«Tengu algu más ricu,
voy a dalti un tronu.

Me llena de orgullu
y satisfacción
podelti anuncial
mi jubilación.

Comu ya sabrás
yo ya estoy mu vieju
y a vecis no pueu
ni con el pelleju.

Comu tú bien sabis
soy un carcamal
y por esu mismu
tengu que abdical.

Tous los elefantis
ya duermin tranquilus
porqui están al tantu
de que me jubilu.

Deju la Corona,
deju la escopeta,
peru no consigu
dejal las muletas.»

Y el Príncipi diju
al oil tou estu:
«No me gusta muchu
sel Felipi sextu.

Pa selti sinceru,
pa estal más contentu
mejol que me llamin
Felipi quinientus.

Y a la nueva Reina,
o sea mi parienta
mejol que la llamin
Leticia cincuenta.

Y a ti te aconseju
cuidal de mi mairi,
no quieru que echis
una cana al airi.

Y deja a Corinna
que no te convieni,
solamenti busca
levantalti el peni.

Y ahora que empieza
prontu mi reinau
voy a selti francu:
Toi acojonau.»

CAPÍTULU 2:LA PRINCESA SE ENTERA DE QUE VA A SEL REINA

-«Ya llegau a casa,
¿andi estás Leticia?
Hoy tengu que dalti
una gran noticia.»

-«¿Qué te pasa cielu?
Te veu mu nerviosu.
¿Han metíu a tu hermana
en el calabozu?»

-«A mi hermana Cristi
déjala tranquila.
Yo quieru decilti
que el Rey se jubila.

Anochi mi padri
me dio una sorpresa,
por fin terminarun
tus días de princesa.

En cuantu se apruebi
una nueva ley
tú vas a sel Reina,
yo voy a sel Rey.»

-«¿Tú me estás contandu
que mi suegru abdica
y que por lo tantu
voy a sel más rica?

¿Tú me estás diciendu
que en un periqueti
dejaré de sel
la princesa Leti?»

-Si,cariñu míu.
Mis padris se van.
Saca un par de copas,
yo traigu el champán.

Jaci muchu tiempu
que ya no bebía,
¡peru qué naricis!
¡Un día es un día!

Estu se mereci
unas copichuelas.
¡Qué alegría más grandi!
¡Viva La Zarzuela!»

-«Bebi despacinu,
ten cuidiau Felipi
que tú de enseguía
te ponis piripi.

-«A mí me dan mieu
los republicanus,
tienin muchas ganas
de metelnus manu.»

-«Si te soy sinceru
yo también los temu,
sobri tou al lídir
que tieni Podemus.

Me refieru al chicu
con el pelu largu
que habla sin tapujus
sobri Don Juan Carlus.

Anochi soñé
que esi Pablu Iglesias
me sacó una muela
¡y sin anestesia!

Solu fue un mal sueñu,
luegu disperté,
peru en esi ratu
¡qué mal lo pasé!

¿Sabis lo que dicin
en el teletextu?
Que ahora voy a sel
Don Felipi Sextu.

Y de tí se dici
que ahora con corona
vas a sel si cabi
más marimandona.»

-«No sé que vestíu ponelmi
en nuestra coronación.»
-Ponti una cosa sencilla
pa no llamal la atención.»

-«Si tu quieris que yo vaya
con un vestíu sencillu
mañana por la mañana
lo compru en el mercadillu.»

-«Yo quieru ponelmi el traji
de capitán general.»
-«Esi traji no me gusta,
déjalu pal carnaval.

Ah,por ciertu Felipín
¿Sel reyis en qué consisti?
¿En saludal sonriendu
sin dal muestras de estal tristi?»

-«En esu precisamenti,
no es algu mu complicau;
por esu dici mi padri
que yo ya estoy preparau.»

ROBERTO MARTÍN MORENO