Rebelde sin pausa

A un muchachu mu rebeldi,
a un muchachu que es mu inquietu
conduciendu un lamborllini
lo han cazau los picoletus.

Es un ídulu de masas
y también es un morral,
y su forma de il en cochi
no pareci mu legal.

Esti jovin millonariu
me pareci un chichipán,
que se da mucha importancia
porqui tieni un club de fans.

Por saltalsi los radaris
y por il mu colocau,
le pusierun las esposas
peru ya lo han liberau.

Y le diju un pulicía:
«Te tendremus vigilau.»
Y con mucha chulería
esti niñu mal criau;

le hizu un corti de mangas
y aluegu una pedorreta,
y entoncis diju el agenti:
«Chachu, a mí se me respeta.

De mí no te cachondeeis
que te canteu la cara.
(Esta frasi se la diju
masticandu un puru zara)

A tí lo que te haci falta
son unus güenus azotis.
(Y esta otra se la diju
agarránduli el cogoti)

¡Y aféitati ya esa barba!
¡Y súbiti esa petrina!
¡Qué ganas tengu de dalti
una valienti tullina!

¡Márchati ya de una vez!
¡Aprisa,que corra el airi!
¡Agila ya pa tu casa
a que te aguanti tu mairi!»

En la calli le esperaban
un montón de quinciañeras,
unas iban bien vestías
y otras iban mediu encueras.

Pocu importa que esti críu
sea un chulu y un capullu,
las mocitas le gritaban
que querían un hiju suyu.

Y por muchas fechorías
que esta criaturita haga
en sus conciertus le tiran
sujetadoris y bragas.

Una vez que vinu a España
se fue con El Orteguita,
y estuvierun toa la nochi
en una casa de citas.

Y cuandu entra en los baris
según dici Leidi Gaga
se bebi los cubalibris
peru luegu no los paga.

¡Menú elementu está hechu!
¡No hay que perdelu de vista!
Sobri tou si te lo encuentras
de frenti en una autopista.

De esti críu consentíu
la genti está mu cansá
y están recogiendu firmas
pa mandalu a Canadá.

Antiel yo tuvi una pesadilla
y me soñé con Justinu Biber,
que se encontraba en Torrejoncillu,
concretamenti dentru del ciber;

y al despertalmi,y al dalmi cuenta
que se trataba sólu de un sueñu,
tranquilamenti seguí escribiendu
estus versinus en extremeñu.

Aunqui conmigu no estén de acuerdu
la mayoría de quinciañeras,
es un aliviu que a nuestru pueblu
no se presenti esta pejiguera.

A esti muchachu tan conflictivu
es vergonzosu que lo liberin,
voy preguntandu por muchus sitius
y me respondin que no lo quierin.

Ni en Moraleja,ni en Acehuchi,
ni en Portezuelu,ni en Cachorrila,
ni en Calamonti,ni en El Pedrosu,
ni en Madroñera,ni en Calzadilla;

ni en Malpartida,ni en Montehermosu,
ni en Olivenza,ni en Jaraiceju,
ni en Serradilla,ni en Don Benitu,
ni tan siquiera en Almendraleju.

Los extremeñus no deseamus
que a nuestra tierra venga de gira,
si algún conciertu tienin que dalnus
muchu mejol que lo de Sakira;

porqui pa vel a Justinu Biber
dánduli sorbus a una petaca,
sigu pensandu que es preferibli
bailal al ritmu del guaka guaka.

ROBERTO MARTÍN MORENO