La Romería: Un día para gozar

No sé si en esta ocasión

viviré la Romería

con esi gran entusiasmu

que otrus añus la vivía.

No sé si saldré con ganas

esi día que tantu admiru

de bailal por la mañana

la canción del tiroriru.

Pues pensandu en esta crisis

de difícil solución,

quizás no me pida el cuerpu

juerga,marcha y diversión.

Y aunque estamus celebrandu

el cincuenta aniversariu,

las cosas están mu negras

según los telediarius.

El paru sigui creciendu

de una forma preocupanti,

muchas familias no sabin

comu saldrán adelanti.

Pa manejal la paleta

currandu en la construcción,

ahora te pidin tarjeta

con cursus de prevención.

Y no pasaré por altu

en estus versus que escribu,

que la tarjeta y los cursus

tienin precius abusivus.

Se rumorea también

que Clan y Teledeporti

puedin dejal de existil

por culpa de los recortis.

La reforma laboral

trai despidus más baratus,

una vez más al obreru

le ha tocau pagal el patu.

¿Dóndi están esas promesas

que Rajoy nos prometía

cuandu diju que el despidu

nunca se abarataría?.

Pareci que sus palabras

se las ha llevau el vientu,

por esu los sindicatus

ya muestran su descontentu.

Las sentencias que se dictan

a diariu en los juzgaus

es otru de esus asuntus

que me tieni preocupau.

Han declarau inocenti

a Camps por lo de los trajis

y culpabli a Contadol

por el tema del dopaji.

La Pantoja sigui libri

por lo del casu Malaya,

un casu que nos confirma

que en la justicia algu falla.

Y haci pocu en un juzgau

de las Islas Balearis

Urdangarín declaró

más mentiras que verdadis.

Ha dichu nuestru monarca

(el suegru de Doña Leti)

que puedi sel que a su yernu

le embarguin el palaceti;

y yo que ya llevu tiempu

sin creel en la justicia

no piensu que le hagan esu

al cuñau de la Leticia.

Estoy en contra del sueldu

que cobran tous esus juecis

y de las bromas sin gracia

de los guiñolis francesis.

Aquí en el pueblu las cosas

tampocu pintan mu bien,

cada vez hay más personas

apuntás en el Inem.

Han cerrau el mataderu

prque no cumpli las normas,

y no tenemus dineru

pa acometel las reformas.

No están las cosas ahora

pa dal saltus de alegría,

esperu que con el tiempu

se noti una mejoría.

Sólu queda la esperanza

pa podel salil del pozu

que se abra cuantu antis

esa mina del Pedrosu.

¡Qué gran noticia sería

la apertura de esa mina

pa trabajal de mineru

igual que Antoniu Molina!

A ti San Pedru benditu

sólu te puedu decil

que ya voy teniendu ganas

de que llegui el mes de Abril.

Si ves que estoy en la ermita

encendiénduti una vela,

no la enciendu pa pedilti

que me toqui una quiniela,

si la enciendu es pa rogalti

que al llegal  la primavera

no nos lleguin más recortis

procedentis de Bruselas.

Y quizás te encienda otra

rezandu pa que Monagu

no tenga entre sus proyectus

implantalnus el copagu.

El día dieciseis de Abril

prometu hacel el intentu

de olvidalmi de esta crisis

aunque solu sea un momentu.

Porque pensándulu bien

la vida son cuatru días

y yo también me merezcu

gozal de la Romería.

Viviré con ilusión

aunque la vida sea mala,

pues comu dici el refrán:

«Al mal tiempu buena cara».

 

ROBERTO MARTÍN MORENO