Las aventuras de Froilan

 

 

 

 

Voy a contarus la historia
de un niñu desobedienti
que disfruta de lo lindu
de su etapa adolescenti;

pos ma dichu un pajarinu
que al muchachinu del Duqui
lo llaman «El Cierrabaris»
cuandu sali de fiestuqui.

Las cuatru de la mañana.
Froilán no ha llegau a casa,
y el Jaimi Marichalal
en vez de mandali un guasa;

ha llamau a dos agentis
del cuerpu de pulicía
pa que lo traigan pa casa
antis que se haga de día.

Fuerun a una discoteca
en busca de la criatura,
peru no fuerun capacis
de conseguil su captura.

Froilán que los vio venil
les supu dal esquinazu
y les diju a sus amigus:
«Amunus a echal un vasu.»

La juerga llegó a su fin.
Froilán regresó a su hogal
pensandu pa sus adentrus:
«¡Qué bronca me van a echal!»

Caminaba haciendu esis,
iba un poquinu alpistau.
¡Y esu que algunus decían
que ya se había reformau!

Es difícil que esti críu
se mantenga en son de paz,
pos fue cortal con la novia
y ha güeltu ya a las andás.

Marichalal va diciendu:
«Esti niñu no madura.
Ya no sé qué hacel con él.
Necesita manu dura.»

No piensa igual Doña Elena,
pos dici que al fin y al cabu
el hiju de sus entrañas
se encuentra en la edá del pavu.

Na más que entró por la puerta
su pairi le echó la bronca,
y Froilán le contestó
con una voz ya mu ronca:

-¡Ay papa,Déjami ya!
¡Hay que vel cómu te ponis
ca vez que salgu de marcha
y me tomu dos gintonis!

-Hiju míu,no me gritis
ni me levantis la voz,
que por la cara que trais
te habrás tomau más de dos.

-Corta el rollu papaitu
que me voy a echal la siesta,
que esta nochi si Dios quieri
me largu otra vez de fiesta.

Y tienis que dalmi perras,
que las que me disti anochi
me las he gastau ya toas.
-Hiju míu¡Qué derrochi!

-¡Qué quieris que yo le haga!
Me dicin que soy la monda.
Cuandu vamus a la barra
siempri pagu yo la ronda.

¿Los cubalibris que tomu
se desgravan en Hacienda
igual que las hipotecas
por compral una vivienda?

-Los cubatas que mencionas
se los toma Rubalcaba,
peru dici el ministeriu
que a esi nunca le desgrava.

Peru tu casu es distintu.
Al sel primu de Leonol,
es posibli que Montoru
te haga un tratu de favol.

Aunqui tengu que decilti
que estu es hablal por hablal.
Pa que Hacienda te desgravi
primeru hay que cotizal.

-Peru papa¿tú no sabis
que siempri estoy cotizandu?
-Lo ignoraba por completu.
¡Peru qué me estás contandu!

-Pos que me dicin las nenas,
por si no te has enterau,
que de mi grupu de amigus
yo soy el más cotizau.

-¡Si es que salis a tu pairi!
No me extraña que les molis.
Yo también ligaba muchu.
-No te tiris más farolis.

Que da igual que yo esté en Londris,
en Venecia o en Perú.
En to los sitius me dicin
que ligu yo más que tú.

Aunqui he de reconocel
que en las cosas del amol
es mi agüelinu Juan Carlus
el galán más seductol.

-Ahí si que llevas razón.
Yo sigu pensandu aún
que el Tenoriu no le llega
ni a la altura del betún.

Tu agüelu es «El Machu Varas»,
«El ligón de los ligonis».
Le quisu tiral los tejus
«La Reina de corazonis»;

peru no hizu güenas migas
con la de Porcelanosa.
Por esu luegu la Presly
se fue con el Viagras LLosa.

-Ay papa,¿qué te pareci
que la próxima semana
nos vayamus a cazal
con el agüelu a Bostwana?

-Cazal contigu hiju míu
es un deporti arriesgau,
peru si esa cacería
nos la paga el jubilau

cogemus las escopetas
y nos vamus con el vieju
¡Comu se te enteri tu mairi
nos va quital el pelleju!

Aquí acaban las andanzas
de esti niñu consentíu.
Esperu que esti relatu
os resulti entreteníu.

Y ya sin más que decil
se marcha vuestru paisanu
deseandulis a ustedis
que disfrutin del veranu.

ROBERTO MARTÍN MORENO