Eurovisión 2016

El sábadu en La Zarzuela
Doña Letizia y el Rey
pusierun Euruvisión
pa vel cantal a Barei.

-«Mira cari.¿Tas dau cuenta
qué bien canta la española?
¿Qué me dicis vida mía?
¿A qué a tí también te mola?»

-» Por supuestu que me gusta.
Y además está mu guapa,
peru ha cantau en inglés
y no he entendíu ni papa.

Ya sabis tú reina mía,
que aunqui ponga muchu empeñu,
no se me da a mí el inglés
también comu el estremeñu.»

-«¡Qué ilusión! Ara mismitu
empiezan las votacionis.»
-«Yo es que es hablalmi de votus
y piensu en las eleccionis.

Esti añu son en juniu
y man fastidau los planis.
¡Con las ganas que tenía
de acudil a los Sanjuanis!

Me había invitau Ballesterus,
que es el alcaldi de Coria,
peru ya no pueu il.
Siempri tengu alguna historia.»

Y le diju Doña Leti
al Rey Don Felipi Sestu:
«Yo esti añu me conformu
con el cuartu o quintu puestu.

La cosa sa puestu fea.
La cosa no pinta bien.
LLevamus quinci puntinus
y Australia pasa de cien.

Felipi,estu ya es
la gota que colma el vasu.
Un pais que no es de Europa
nos está dandu un repasu.»

-«¿Que Australia no es europea?»
-«No cariñu,es de Oceanía.
¿Es que no aprendistis esu
cuandu dabas Geografía?»

-«¡Si es que ya no me acordaba!
Perdona por mi ignorancia.
Esperu que por lo menus
le demus pal pelu a Francia.»

-«Pos esu va sel dificil.
También nos están ganandu.»
-«Apaga la teli entoncis,
que me estoy desanimandu.

Y encima es que tengu sueñu.
Yo mejol me voy a echal.»
-«Espérati un momentinu
que vamus a remontal.

Si tous nos dieran los puntus
que nos ha otorgau Italia,
seguru que denseguía
cogemus a los de Australia.

¡Oli por los italianus!
¡Doci puntus nos han dau!
De los paisis que votan
el que mejol sa portau.»

En el últimu suspiru
ganarun los ucranianus,
y la medalla de plata
la tienin los australianus.

Y le decía Felipi
a su esposa Doña Leti:
«¿Cuantus puntus tieni España?»
-«Tan solu setenta y sieti.

En el puestu veintidos.
¡No me lo pueu creel!
La genti ya está pidiendu
que güelva a cantal Massiel.»

-«¿Y que tal los alemanis?»
-«Los últimus han queau.
¡Imagínati la Merkil
que disgustu sa llevau!»

-«Entoncis voy a mandal
mi enhoragüena pa Ucrania
y el pésami a la Angelina
por el puestu de Alemania.»

-«Ni en español ni en inglés.
Estu no lleva caminu.
Si esu el prósimu añu
mejol cantamus en chinu.»

-«Tienis razón vida mía.
Pa que estu llegui a güen fin
mejol que al añu que vieni
cantemus en mandarín.

A vel si de esa manera
se acaba esta mala racha.»
-«Yo lo sientu por Barei.
Me da pena la muchacha.»

-«Tú es que eris mu sentía.
Yo en cambiu no sientu pena.
¡Verás que prontu la fichan
los de Tu Cara me suena!

ROBERTO MARTÍN MORENO